सोशल मीडियाचा अतिवापर ठरला 'त्यांच्या' घटस्फोटाचे कारण

सकाळ वृत्तसेवा (यिनबझ)
Monday, 2 March 2020

मुळात दोघांत मोठा वाद नव्हता. पत्नी बॅंकेत नोकरी करते. त्यामुळे तिला वाटायचे की घरी आल्यानंतर पतीने आपल्याशी गप्पा कराव्यात. कोणत्याही गोष्टीला काही रेषा असतात. या रेषा दिसत नाहीत. पण, त्या पाळल्या पाहिजेत. संशय येईल असे आपण वागूच नये, असे त्यांचे समुपदेशन करण्यात आले. 
- ॲड. प्रगती पाटील, मीडिएटर

पुणे : ‘हे रात्री उशिरापर्यंत सोशल मीडियावर ॲक्‍टिव्ह असतात... घरी आल्यानंतर माझ्याशी नीट बोलत नाहीत... त्यांना मित्र-मैत्रिणीच जवळच्या झाल्या आहेत,’ अशी तक्रार करीत पत्नी घटस्फोटासाठी कौटुंबिक न्यायालयात गेली. मात्र, दोघांचेही आणि खासकरून पतीचे समुपदेशन झाल्यानंतर त्याने अखेर सोशल मीडियाचा कमी वापर करण्याचे ठरविले. त्यामुळे सोशल मीडियाच्या अतिवापरामुळे होणारा घटस्फोट टळला.

‘मी दिवसभर ऑफिसला असतो. काम करून बोअर होतो; म्हणून मित्र-मैत्रिणींशी बोलतो. मला त्यांना वेळ देता येत नाही. तेदेखील महत्त्वाचे आहेत ना,’ अशी भूमिका या वादावर आयटीत काम करणाऱ्या रोहनने घेतली होती; तर पत्नी ललिता हिच्या लक्षात आले की, पती घरी आल्यानंतर रात्री उशिरापर्यंत फोनला चिकटून असतो.

सतत सोशल मीडियाचा वापर करतो. या सर्व बाबी तिने सासू-सासऱ्यांना सांगितल्या. ‘घरी लक्ष देत जा. कामावरून आल्यावर पत्नीला वेळ दे,’ असे त्यांनी मुलाला समजावले. त्यामुळे त्यांच्यातील वाद तात्पुरता मिटायचा. मात्र, काही दिवसांनंतर पुन्हा पहिले पाढे पंचावन्न. त्यामुळे त्याची पत्नी वेगळी राहू लागली व तिने घटस्फोटाचा दावा दाखल केला. 

हा दावा कौटुंबिक न्यायालयातील मीडिएटर ॲड. प्रगती पाटील यांच्याकडे समुपदेशनासाठी आला. ‘केवळ टाइमपास करणारे मित्र-मैत्रीण संसार नाही करू शकत. कुटुंबासाठी आपल्या काही जबाबदाऱ्या असतात. मित्रपरिवार प्रत्येक वेळी आपले घर सांभाळणार नाहीत. त्यासाठी पत्नीच गरजेची असते,’ असे ॲड. पाटील यांनी रोहितला समजावले. ‘तुझा पती थोडा सोशल आहे. त्यामुळे त्यावर सतत संशय घेऊ नको. त्याने सोशल मीडियाचा वापर कमी करण्याचे ठरविले आहे,’ असे ललिता यांना सांगण्यात आले. त्यानंतर पतीला काही अटी टाकल्यानंतर ते पुन्हा एकत्र आले.

या अटींवर टिकला संसार...

  • घरी आल्यानंतर पत्नीला वेळ देईन
  • खूप गरज असेल तेव्हाच फोनचा वापर 
  • ठरावीक वेळेनंतर मोबाईल बंद 
  • घरात चांगले लक्ष देईन
  • गैरसमज होतील, असे दोघेही वागणार नाहीत

Become YINBuzz contributor. Write your stories, publish your photos and videos using Sakal Samvad App (*YINBuzz.com हा तरूणाईसाठीचा खुला डिजिटल फोरम आहे. इथे प्रसिद्ध झालेल्या मतांशी वेबसाईटचे व्यवस्थापन सहमत असेलच; असे नाही.)

Download Samvad App

Related News