शेतकरी युवकांना वधूंनकडून नकार

सकाळ वृत्तसेवा (यिनबझ)
Thursday, 5 March 2020
  • उत्तम शेती, मध्यम व्यापार आणि कनिष्ठ नोकरी असे एकेकाळी म्हटले जात होते; मात्र काळाच्या ओघात महागाई वाढली आणि सोबतच नोकरदारांचे वेतनही वाढले; पण शेती व्यवसाय घाट्यात आला.

फुलंब्री : उत्तम शेती, मध्यम व्यापार आणि कनिष्ठ नोकरी असे एकेकाळी म्हटले जात होते; मात्र काळाच्या ओघात महागाई वाढली आणि सोबतच नोकरदारांचे वेतनही वाढले; पण शेती व्यवसाय घाट्यात आला. त्यामुळे आधुनिक युगात नोकरी श्रेष्ठ, व्यापार मध्यम व शेती कनिष्ठ झाली आहे. परिणामी, विवाहेच्छुक तरुणींकडून नोकरीवालाच नवरा पाहिजे, असा आग्रह होत आहे. त्यामुळे ग्रामीण भागातील शेतकरी युवकांना वधू मिळत नसल्याचे चित्र आहे. 

सध्या अनेक विवाहेच्छुक तरुण-तरुणींचे पालक स्थळ शोधत आहेत; मात्र शिक्षण व नोकरी असा दुहेरी लाभ देणाराच वर आपल्या मुलीला मिळावा, अशी अपेक्षा मुलगी व तिच्या कुटुंबीयांकडून व्यक्त होऊ लागली आहे. ग्रामीण क्षेत्रात सरकारी नोकरी मिळणाऱ्यांची संख्या नगण्यच आहे. अशातच शेती व इतर व्यवसायांचा पर्याय असतो; परंतु परंपरागत शेती व्यवसाय करणाऱ्या युवकांना आता ग्रामीण भागातील शिक्षित युवतीही पसंती देत नाहीत. अशातच नोकरी नसलेला पण उच्चशिक्षित असूनही शेतीच्या माध्यमातून लाखोंचे उत्पन्न काढणाऱ्या युवकांना विवाह जुळविण्यात अडचण येत आहे.

ग्रामीण युवतींनीसुद्धा शेतकऱ्यांच्या मुलासोबत लग्न करण्यापेक्षा ज्यांच्या कुटुंबीयांत शेती नाही पण त्याला सरकारी किंवा कंपनीत नोकरी असली तरी त्याला पसंती देताना अनुभवास येत आहे. सध्या विवाह समारंभाचा मोसम आहे. जुळलेले विवाह पार पडत आहेत. नवीन सोयरीक जुळविण्यासाठी इच्छुक युवकांचे कुटुंब आपल्या मुलाचा संसार थाटण्यासाठी वधुपित्याच्या पायऱ्या झिजवीत आहेत. शहरी भागापासून तर ग्रामीण भागातही सुशिक्षित बेरोजगारांची संख्या वाढत असतानाच मुलींच्या प्रमाणात घट झाली आहे.

वाढले आंतरजातीय विवाहाचे प्रमाण

उच्चशिक्षित व एकाच कार्यालयात नोकरी करणारे युवक व युवती आपल्या प्रेमप्रकरणातून इच्छुक स्थळ निवडतात. यात जात व धर्म बघितला जात नाही. आंतरजातीय विवाहाच्या माध्यमातून ते आपला संसार टिकवितात. त्यामुळे दिवसेंदिवस आंतरजातीय विवाहांचे प्रमाण वाढत चालले आहे.

कुटुंबाला पुरेसा वेळ देणाऱ्या युवकांचा शोध 

शेती व व्यापारातून आर्थिक समृद्धी साधता येते; मात्र हे व्यवसाय स्वत:वर अवलंबून असल्याने युवक या व्यवसायात स्वत:ला वाहून घेतात. त्यामुळे परिवाराला पुरेसा वेळ देऊ शकत नाहीत. याउलट नोकरदार वर्ग दिवसातून सात-आठ तास काम करून घरी परततात. त्यामुळे युवतींचा कल नोकरदार वर्गाकडे अधिक दिसून येतो.
 

Become YINBuzz contributor. Write your stories, publish your photos and videos using Sakal Samvad App (*YINBuzz.com हा तरूणाईसाठीचा खुला डिजिटल फोरम आहे. इथे प्रसिद्ध झालेल्या मतांशी वेबसाईटचे व्यवस्थापन सहमत असेलच; असे नाही.)

Download Samvad App

Related News