पार्वतीकुमार जन्मशताब्दीनिमित्त येणार दीड हजार नर्तक एकत्र. 

सकाळ वृत्तसेवा (यिनबझ)
Saturday, 22 February 2020

आचार्य पार्वतीकुमार यांची जन्मशताब्दी साजरी केली जाणार आहे. त्यानिमित्त 27 फेब्रुवारी ते 1 मार्चदरम्यान नेहरू सेंटर, रवींद्र नाट्यमंदिर, भरत कॉलेज सेंटर येथे महोत्सवाचे आयोजन करण्यात आले आहे.

मुंबई : भारतीय शास्त्रीय संगीताला आचार्य पार्वतीकुमार यांनी जगभरात पोहोचवले. तसेच ही भारतीय परंपरा, संस्कृती टिकवून ठेवण्यात त्यांनी मोलाची भूमिका बजावली. लवकरच आचार्य पार्वतीकुमार यांची जन्मशताब्दी साजरी केली जाणार आहे. त्यानिमित्त 27 फेब्रुवारी ते 1 मार्चदरम्यान नेहरू सेंटर, रवींद्र नाट्यमंदिर, भरत कॉलेज सेंटर येथे महोत्सवाचे आयोजन करण्यात आले आहे. यात जगभरातील दीड हजारहून अधिक कलाकार शास्त्रीय नृत्याचे सादरीकरण करणार आहेत.

महोत्सवात शास्त्रीय नृत्य, शास्त्रीय वाद्य, शास्त्रीय संगीत यांसारख्या एकूण नऊ कार्यक्रमांचे आयोजन करण्यात आले आहे. ऋतुचक्र आणि चित्रसूत्र हे दोन कार्यक्रम महोत्सवाचे विशेष आकर्षण असणार आहेत. ऋतुचक्र हा कार्यक्रम महाकवी कालिदासांच्या काव्यांवर आधारित असणार आहे; तर चित्रसूत्र कार्यक्रमात प्रथमच शास्त्रीय नृत्याबरोबर कला, नाट्य, चित्रकला यांचा एकत्रित आविष्कार प्रेक्षकांना अनुभवता येणार आहे. आचार्य पार्वतीकुमार यांच्या शिष्या आणि संगीत नाटक अकादमी पुरस्कार विजेत्या, शिवाय सरफोजीराजे भोसले सेंटरच्या संचालिका गुरू डॉ. संध्या पुरेचा यांनी महोत्सवाचे आयोजन केले आहे. महोत्सवात डॉ. संध्या पुरेचा, पद्मश्री पुरू दधीच, गुरू विभा दधीच यांचा नृत्याविष्कार, दामिनी नाईक हिचे अरंगेत्रम्‌ या कलाप्रकाराचे सादरीकरण केले जाणार आहे. बालनृत्यांगना, किणकीणी या कलाविष्कारामध्ये युवा नृत्यांगनांचा समावेश असणार आहे.

Become YINBuzz contributor. Write your stories, publish your photos and videos using Sakal Samvad App (*YINBuzz.com हा तरूणाईसाठीचा खुला डिजिटल फोरम आहे. इथे प्रसिद्ध झालेल्या मतांशी वेबसाईटचे व्यवस्थापन सहमत असेलच; असे नाही.)

Download Samvad App

Related News