आई बदलतेय 

सौ तनुजा सुरेश मुळे
Thursday, 7 November 2019

आई आता स्मार्ट किचन मध्ये
नवं नव्या रेसिपी बनवते
कंटाळा आला तर चक्क स्विगीचे
पार्सल मागवतेय
खरचं आई आता बदलतेय ।

आई आता दिसत नाही सतत
कळकट मळकट धुडक्यात
दिवसभर कामाच्या रगाड्यात
आई आता मस्त जीन्स टॉप घालतेय
आई आता स्वतःसाठी सुद्धा वेळ काढतेय
कारण आई आता बदलतेय ।

आई आता बसत नाही चुलीपुढे
लाकडं फुंकून फुंकून डोळे लाल करत
आई आता स्मार्ट किचन मध्ये
नवं नव्या रेसिपी बनवते
कंटाळा आला तर चक्क स्विगीचे
पार्सल मागवतेय
खरचं आई आता बदलतेय ।

आई आता पसरत नाही बाबांकडे हात छोट्या छोट्या गरजांसाठी
आणि खात नाही सासूचा आणि नवऱ्याचा मार
उलट आई आता बाबांच्या खांद्याला खांदा लावून कमावतेय
हो खरंच आई आता बदलतेय ।

आई आता रडत नाही जुन्या दिवसांचे गाऱ्हाणे
सासवा नणंदा जावांचे ते घेत नाही उखाणे
ती आता म्हणत नाही बाईचा जन्म खोटा
उलट मुलाला पराठे अणि मुलीला कराटे शिकवतेय
हो खरचच आई आता बदलतेय ।

आई आता हसतेय , नाचतेय ,
मनासारखे जगतेय , काळाप्रमाणे बदलतेय , आवडेल तसंच वागतेय 

पण.....
बाळाचं रडणं ऐकू येताच
तीचे पाऊल मात्र थबकतेय
खरंच का आई अगदी पुर्णपणे बदलतेय ?

.

Become YINBuzz contributor. Write your stories, publish your photos and videos using Sakal Samvad App (*YINBuzz.com हा तरूणाईसाठीचा खुला डिजिटल फोरम आहे. इथे प्रसिद्ध झालेल्या मतांशी वेबसाईटचे व्यवस्थापन सहमत असेलच; असे नाही.)

Download Samvad App playstore

Related News