तोंड येण्यावर असे करावे उपाय

अनेकांना सध्या तोंड येण्याच्या तक्रारीचा सामना करावा लागतोय. विविध कारणांमुळे ही तक्रार उद्‍भवते. तोंडाच्या आतील त्वचा सोलल्यासारखी होते. त्याचप्रमाणे, जीभ, ओठ, गालाच्या आतील बाजूला सूज येते. तोंडाच्या आतील भागात किंवा ओठावर फोड येतो. तोंड आल्यावर काहीही खाताना जीभ, हिरड्यांची आग होते. तिखट, आंबट पदार्थ अजिबात खाता येत नाहीत.

त्याचप्रमाणे अन्न गिळायलाही त्रास होतो. तोंड येण्यामागे जीवनशैली तसेच आहाराशी निगडित विविध कारणे असू शकतात. आपण यामागील कारणे जाणून घेऊयात. विविध पोषक द्रव्यांच्या अभावामुळे तोंड येऊ शकते. त्याचप्रमाणे ‘ब १२’ जीवनसत्त्वाचा अभावामुळेही तोंड येते. आहारात तिखट, मसालेदार, तेलकट पदार्थ अधिक प्रमाणात घेणे. त्याचप्रमाणे, अतिमांसाहार घेणे.

चहा, कॉफीचे अतिरिक्त सेवन करणे. धूम्रपान व इतर प्रकारे तंबाखूसेवन करणे. विशिष्ट प्रकारच्या काही औषधांमुळेही तोंड येऊ शकते. तोंडाच्या अस्वच्छतेमुळे संसर्ग होऊनही तोंड येण्याची शक्यता असते. दातांचे काही विकार असल्यास त्याच्या संसर्गामुळे किंवा तोंडात जखम होऊनही तोंड येते. तोंड येण्याची कारणे साधारणत: वरीलपैकी असू शकतात. साध्या ॲलर्जीपासून कर्करोगासारख्या आजाराचेही ते लक्षण असू शकते. मात्र, त्यासाठी डॉक्टरांचा सल्ला घेणेच योग्य.