जगज्जेतेपदे विकून, पंतप्रधान निधीस मदत

नवी दिल्ली ः पंधरावर्षीय गोल्फ खेळाडू अर्जुन भाटी याने आठ वर्षांत जिंकलेल्या शंभरहून अधिक स्पर्धा विजेतेपदे जिंकून त्याद्वारे मिळालेले सव्वाचार लाख रुपये कोरोनाग्रस्तांच्या मदतीसाठी दिले आहेत.

देशभरातील अनेक क्रीडापटूंची रक्कम अर्जुनपेक्षा जास्त असली, तरी त्याने विजेतेपदेही विकून रक्कम उभारल्याने ती खूपच मोलाची आहे. अर्जुनने मित्र तसेच नातेवाईकांना हे विजेतेपदाचे करंडक घेण्याची विनंती केली. त्यात तीन जागतिक विजेतेपदांचा समावेश होता. ""आपला देश सध्या खूपच कठीण परिस्थितीतून जात आहे. प्रत्येकाने आपल्याला शक्‍य होईल, त्या मार्गाने मदत करायला हवी. गेल्या आठ वर्षांत मी 102 करंडक जिंकले आहेत.

आई-वडिलांच्या मित्रांना, नातेवाईकांना हे करडंक घेऊन त्याबद्दल पैसे देण्याची विनंती केली. त्यातून 4 लाख 30 हजार रुपये गोळा झाले. ते सर्व मी पंतप्रधान मदतनिधीस दिले आहेत," असे अर्जुनने सांगितले.

कोरोनाविरुद्धच्या मोहिमेसाठी आपलेही योगदान असावे, असे वाटत होते. मी काही स्वतः कमवत नाही. त्यामुळे मी विजेतेपदाचे करंडक विकण्याचे ठरवले. ही स्पर्धा-विजेतेपदे मी नंतरही जिंकू शकतो. पण कोरोनाविरुद्ध लढण्यासाठी पैशाची गरज असताना मी शांत बसू शकत नाही. विकलेली सर्व विजेतेपदे सध्या घरात आहेत. लॉकडाऊन संपल्यानंतर मी ज्यांनी ती घेतली, त्यांच्याकडे देणार
आहे.