रशियामध्ये अडकलेले ४८० विद्यार्थी मायदेशी परतले

सकाळ वृत्तसेवा (यिनबझ)
Monday, 13 July 2020

कोरोनामुळे विविध देशांमध्ये लागू असलेल्या लॉकडाऊनमुळे अनेक भारतीय मायदेशी परतण्यासाठी प्रयत्नशील आहेत. रशियामध्ये महाराष्ट्रातील तब्बल ४८० वैद्यकीय अभ्यासक्रमाचे विद्यार्थी अडकले होते.

मुंबई :- कोरोनामुळे विविध देशांमध्ये लागू असलेल्या लॉकडाऊनमुळे अनेक भारतीय मायदेशी परतण्यासाठी प्रयत्नशील आहेत. रशियामध्ये महाराष्ट्रातील तब्बल ४८० वैद्यकीय अभ्यासक्रमाचे विद्यार्थी अडकले होते. राज्य सरकारने पुढाकार घेत या विद्यार्थ्यांना महाराष्ट्रात आणण्यासाठी केलेल्या प्रयत्नांना अखेर यश आले आहे. हे विद्यार्थी रविवारी मॉस्को विमानतळावरून भारतात येण्यासाठी निघाले असून सोमवारी पहाटे ५ वाजता ते मुंबई विमानतळावर उतरले आहेत.

कोरोनामुळे हवाई वाहतूक सेवाही बंद करण्यात आली होती. त्यामुळे रशियामध्ये वैद्यकीय शिक्षणासाठी गेलेले ४८० विद्यार्थी तेथेच अडकले. यातील ५७ विद्यार्थ्यांनी नुकतीच पदवी घेतली असून, ते रुग्णसेवा करण्यासाठी सज्ज झाले आहेत. या विद्यार्थ्यांना भारतात आणण्यासाठी महाराष्ट्राचे मुख्यमंत्री उद्धव ठाकरे आणि पर्यटन मंत्री आदित्य ठाकरे यांनी पुढाकार घेत रशिया आणि भारतीय दूतावासांशी संपर्क साधत या विद्यार्थ्यांना भारतामध्ये आणण्यासाठी विशेष प्रयत्न केले. त्याला यश आले असून, या विद्यार्थ्यांना रॉयल फ्लाईट बोईंग ७७७ या चार्टड विमानाने भारतात आणण्यात आले आहे. या विद्यार्थ्यांना भारतात आण्यासाठी निक्‍स टूरचे संचालक डॉ. निकेश रंजन यांनी रशियाचे रॉयल फ्लाईट आणि मॉस्कोमधील भारतीय दूतावासाशी संपर्क साधून चार्टड विमानाची व्यवस्था केली.

अन्य विद्यार्थ्यांनाही दिलासा

विद्यार्थ्यांना भारतात आणण्यासाठी महाराष्ट्र सरकार आणि नागरी हवाई विभागाचे मुख्य सचिव वल्सा नायर सिंग यांच्यासोबत मुंबई महापालिकेचे शिक्षण सदस्य साईनाथ दुर्गे यांनी समन्वयाची भूमिका पार पडत विविध परवानगी मिळवण्याचे काम चोख पार पाडले. रशियातून भारतामध्ये प्रथमच इतक्‍या मोठ्या प्रमाणात अडकलेल्या विद्यार्थ्यांना आणण्यात आले आहे. हे विमान महाराष्ट्रात आणण्यात आल्यानंतर अन्य विद्यार्थ्यांनाही रशियामधून परत आणण्यासाठी विमानाची व्यवस्था करण्यात येणार आहे.

 

Become YINBuzz contributor. Write your stories, publish your photos and videos using Sakal Samvad App (*YINBuzz.com हा तरूणाईसाठीचा खुला डिजिटल फोरम आहे. इथे प्रसिद्ध झालेल्या मतांशी वेबसाईटचे व्यवस्थापन सहमत असेलच; असे नाही.)

Download Samvad App playstore

Related News